Dende a Asociación de Familias de Nenos con Necesidades Especiais Paseniño iniciamos este ano o proxecto Coordinación do servizo de respiro familiar, grazas á subvención concedida pola Deputación da Coruña, no marco da convocatoria FOAXE-P/2025 para o mantemento de programas e servizos en materia de servizos sociais.
Esta axuda permite financiar o 80 % do custo do proxecto, facendo posible a continuidade e mellora dun servizo fundamental para moitas familias da comarca.
Un apoio esencial para as familias coidadoras
O servizo de respiro familiar ten como obxectivo principal apoiar ás familias con nenos, nenas e adolescentes con diversidade funcional, facilitando tempos de descanso e conciliación ás persoas coidadoras, reducindo a sobrecarga familiar e favorecendo o benestar de todo o núcleo familiar.
A través deste proxecto garántese unha atención axustada ás necesidades específicas de cada menor, ao contar cunha persoa encargada de coordinar este servizo, priorizando a seguridade, o acompañamento individualizado e a participación en contornos comunitarios normalizados.
Coordinación e atención personalizada
O proxecto céntrase na coordinación do servizo de respiro familiar, unha labor clave para asegurar unha intervención de calidade. Entre as principais actuacións inclúense:
- Información, acollida e valoración inicial das familias.
- Planificación e organización do servizo de respiro.
- Coordinación e supervisión do persoal de atención directa.
- Comunicación continua e seguimento coas familias usuarias.
- Coordinación con recursos comunitarios e entidades da contorna.
O servizo desenvólvese principalmente no Concello de Cee, utilizando recursos comunitarios e espazos municipais, aínda que as familias beneficiarias proceden de distintos concellos da comarca.
Un compromiso coa inclusión e a conciliación
Grazas a esta subvención, Paseniño pode seguir ofrecendo un recurso flexible, próximo e adaptado, que responde a situacións reais de conciliación, necesidades sobrevidas e momentos especialmente delicados para as familias.
Desde a asociación queremos agradecer á Deputación da Coruña o seu apoio e confianza, que nos permite continuar traballando por unha atención máis inclusiva, polo benestar dos nenos e nenas e polo coidado de quen coida.
Seguimos avanzando, xuntas e xuntos, por unha sociedade máis inclusiva.